.. قُـولوا أنّها مش عمليّة تحرير , ولا ليها علاقـة بـ رجْـل خميس لا صلعة سيف لا بُوكسر القذّافي !!
.. قُـولوا احنا خسرنـا الانتخابات وخايفين مجلـس النواب يرفع الشرعيّـة عن الدروع وبـاقي الكتايب المحسُـوبة عليكم ومعاش تقعد عندكم لا سيطرة لا نفُـوذ لا أموال تُضخّ في حساباتكم !
.. قُـولوا احنـا ربحْنـا الحـرب وما عندناش استعداد نتنازلوا عن السُّلـطة ولا ديموقراطيّة لا بطّيخ !
.. قُـولوا أنّـكم خايفين من قيام دولة وقيام جيش وشُرطـة لأنّكم أجرمتم وبتكونوا أوّل من يتحاكم لو صار في قـانون خُصـوصاً وأنّ النيابات مليانة بالمحاضر السرّية للنّـاس اللي تضررت منكم وتستنّى في قيـام الدولة بش تاخذ حقّـها !
.. قُـولوا ( قتلنـا القذّافي ) طمعاً في السُّلـطة , ومن حقنـا نحكموكم ونركبُـوكم !
.. فكُّـونا من اسطوانـة الجهــاد وتصحيـح مسـار البطّيـخ .. قُـولوها للنّـاس خلّي يعرفوا موقفهم من اللي صايــر .. بالك يحاربوكم ولا يساندوكم ولا يلمُّـوا قشيشهم ويرحلوا ويخلوهالكم واسعة وعريضـة !
• مُـلاحظـة !!
.. مش كُـلّ من حارب القذّافي هو شخص وطني ومش كُـلّ من طلع ضد القذّافي كان طموحه دولـة !
في اللي طلـع لانّـه راغب في السلطـة !
في اللي طلع لأنّ قبيلتـــه طلعــــــت !
في اللّي طلـع لانّه يبّي الغنـــــايم !
في اللي طلع لأنّه يبي دولة عدل وقانون ومساواة !
في اللي طلع بش يحرق مركز الشرطـة اللي مليان بمحاضر ضدّ جرايمه !
... المُعارضة مش كلّها وطنيّة .. في اللي عارض القذّافي بعد ما خنب مبلغ من الدولة وهرب وفي اللي عارضه بعد ما كان معاه لانّ القذّافي غدر بيه .. وفي اللي عارض القذّافي لانه كان ضد توجّهاته السياسيّـة وما سمحلاش يدير حزب يمارس من خلاله نشاطه السّياسي .. والثـوّار على الأرض ماكانوش كلّهم ملائكـة او كائنات نزلت من الفضاء او صحابة بُعثـوا من جديد بش يكونوا معصومين من الخطـأ او ما عندهمش تجاوزات و ما ارتكبوش جرائمـ !
... فيهم الصّـالح والطّـالح حالهم حال الطرف الثّـاني .. حالهم حـال كل اللّيبيّين والبيئـة اللي عاشُـوا فيهــا !!
.. لهذا و للمـرّة السكستين بعد الألف .. ما فيش دولـة تُبنى بالإقصـاء وما فيش مدينة وصيّة على ليبيا .. وما فيش تحريـر بالتدميـر .. ولا تعْميــر بالخرابْ !
.. اللّي بيقُـول ( جهــاد وحـرْب أزلامـ ) !
نقوله لو انت ( راجـل ومُقتنـع بأنّه جهاد وحرب حقّ ) أطـلع قيم سلاحك و شارك فيها شن قاعد تستنّى بدل ما تفتفتلي في الفيـس !
.. اللي بيقُـول ( تكلم على الجهة الثانية ) ..!
.. انقولّـه لمّـا نلقاهم هما اللّي باديين الحرب ولما نلقاهم رافضين البرلمان ولما نلقاهم مش جانحين للسّلم ورافضين خيارات الشعب .. وقتها تو ننـزل فيهمـ !
درّهتُـولنا كبُـودنا بالشّعارات والأفلام الوهميّــــة بش تقنّعونـا بحـرْبكم على الكًرسـي !~
خلُّوكم ( فقـش ) زي مجلـس شورى بنغـازي والدّواعـشْ اللي نحيّيهم على صراحتهم ووضوح أهدافهم واللي ضربوا ( _|_ ) هكّـي كُبـره لأحزاب الاسلام السّياسي اللّي حاولت تستقطبهم وتستفيد منهم ودعمتهم بالمال والسّلاح من خلال زواج عُـرفي ( للمصْـلحة ) , وفي الأخيــر ( لوحولهم الورقة على وجوههم ) بعد ما استفادوا منهم وقالولهم ( انتَ لا زوجي ولا اعرفك , انا طلّقتك ) انا طمُـوحي أكبـر من كِـده , انا نفْسي في ( إمـارة ) !! ~
.jpg)
0 التعليقات:
إضغط هنا لإضافة تعليق
إرسال تعليق
Blogger Widgets